ಬೆಳಗಾವಿ,: ಬೆಳಗಾವಿ ನಗರದ ಕ್ಯಾಂಟೋನಮೆಂಟ್ ವ್ಯಾಪ್ತಿಯ ವಸತಿ ಪ್ರದೇಶವನ್ನು ಪಾಲಿಕೆಯಲ್ಲಿ ವಿಲಿನಗೊಳಿಸುವುದಕ್ಕೆ ಬೋರ್ಡನ ಒಟ್ಟು 1763.78 ಎಕರೆ ಜಾಗೆಯ ಸಂಪೂರ್ಣ ಸಮೀಕ್ಷೆ ಕೈಗೊಂಡು 15 ದಿನಗಳೊಳಗಾಗಿ ವರದಿ ಸಲ್ಲಿಸುವಂತೆ ಜಿಲ್ಲಾಧಿಕಾರಿ ಮೊಹಮ್ಮದ್ ರೋಷನ್ ಅವರು ಸೂಚಸಿದ್ದಾರೆ.
ರಕ್ಷಣಾ ಸಚಿವಾಲಯದ ಜಂಟಿ ನಿರ್ದೇಶಕರೊಂದಿಗೆ ನಡೆದ ವಿಡಿಯೋ ಸಂವಾದದ ನಂತರ ಅಧಿಕಾರಿಗಳ ಸಭೆಯಲ್ಲಿ ಮಾತನಾಡಿದ ಅವರು, ಕ್ಯಾಂಟೋನ್‌ಮೆಂಟ್ ಸಿವ್ಹಿಲ್ ಏರಿಯಾಗಳನ್ನು ಬೆಳಗಾವಿ ಮಹಾನಗರ ಪಾಲಿಕೆಯ ವ್ಯಾಪ್ತಿಗೆ ವರ್ಗಾಯಿಸುವ ಕುರಿತು ಜಂಟಿ ಸಲಹಾ ಸಮಿತಿ ರಚಿಸುವಂತೆ ಪೌರಾಡಳಿತ ನಿರ್ದೇಶನಾಲಯದ ನಿರ್ದೇಶಕರಿಗೆ ಕೋರಲಾಗಿದೆ. ಸಮಿತಿಯು ಬೆಳಗಾವಿ ಕ್ಯಾಂಟೋನ್‌ಮೆಂಟನ ಒಟ್ಟು 1763.78 ಎಕರೆ ಜಾಗೆಯ ಸಂಪೂರ್ಣ ಸಮೀಕ್ಷೆ ಕೈಗೊಂಡು 15 ದಿನಗಳೊಳಗಾಗಿ ಜಿಲ್ಲಾಧಿಕಾರಿಗಳಿಗೆ ವರದಿ ಸಲ್ಲಿಸಬೇಕೆಂದು ನಿರ್ದೇಶಿಸಿದರು.
ಎ-1 ವರ್ಗದ ಜಾಗ 929.19 ಎಕರೆ ಜಾಗ ಎಲ್.ಎಂ.ಎ. ಲೋಕಲ್ ಮಿಲ್ಟರಿ ಅಥೋರಿಟಿ (ಐಒಂ) ಅವರ ನಿರ್ವಹಣೆಗೊಳಪಟ್ಟಿರುತ್ತದೆ. ಉಳಿದ ಜಾಗೆಯ ವಿಸ್ತೀರ್ಣ, ವಸ್ತುಸ್ಥಿತಿ ಹಾಗೂ ಯಾವ ಉದ್ದೇಶಕ್ಕಾಗಿ ಬಳಕೆಯಾಗುತ್ತಿದೆ ಎಂಬುದನ್ನು ತಿಳಿಸಬೇಕು. ಎ-2 ವರ್ಗದ 37.94 ಎಕರೆ ಮಿಲ್ಟರಿ ಮೀಸಲು ಪ್ರದೇಶ , ಅದರಲ್ಲಿನ 0.83 ಎಕರೆ, ಬಿ-1 ವರ್ಗದ ಜಾಗ 43.78 ಎಕರೆ ಕೇಂದ್ರ ಸರ್ಕಾರದ ಭೂಮಿ. ಬಿ-2 ವರ್ಗದ 84.60 ಎಕರೆ ರಾಜ್ಯ ಸರ್ಕಾರದ ಆಡಳಿತಕ್ಕೊಳ್ಪಟ್ಟಿದೆ. ಅದರಲ್ಲಿನ 53.29 ಎಕರೆ, ಬಿ-3 ವರ್ಗದ 319.97 ಎಕರೆ ಜಾಗೆಯು ಡಿಫೇನ್ಸ್ ಎಸ್ಟೇಟ್ ಆಫೀಸರ್ ಅವರ ಅಧೀನದಲ್ಲಿದ್ದು, 28.43 ಎಕರೆ, ಜಾಗೆಯನ್ನು ಕೂಡ ಪಾಲಿಕೆಗೆ ಹಸ್ತಾಂತರಿಸಲು ಪ್ರಸ್ತಾವನೆ ತಯಾರಿಸಲಾಗಿದೆ. ಬಿ-4 ವರ್ಗದ 169.52 ಎಕರೆಯ ವಸ್ತುಸ್ಥಿತಿ ಮತ್ತು ಬೋರ್ಡನ 98.28 ಎಕರೆ ಸಿ-ಲ್ಯಾಂಡ್ ಬಳಕೆಯ ಕುರಿತೂ ವರದಿ ನೀಡುವಂತೆ ತಿಳಿಸಿದರು.
ಬೆಳಗಾವಿ ಕ್ಯಾಂಟೋನ್‌ಮೆಂಟ್ ಬೋರ್ಡನ ವ್ಯಾಪ್ತಿಯ ಒಟ್ಟು ಜಾಗೆ 1763.73 ಎಕರೆ ಜಾಗೆಯ ಪೈಕಿ ಕೇವಲ 112.68 ಎಕರೆ ಜಾಗೆಯನ್ನು ಮಾತ್ರ ಹಸ್ತಾಂತರಿಸಲು ಕರಡು ಪ್ರಸ್ತಾವನೆಯನ್ನು ತಯಾರಿಸಲಾಗಿರುವುದಕ್ಕೆ ಆಕ್ಷೇಪ ವ್ಯಕ್ತಪಡಿಸಿ, ಸಿವಿಕ್ ಏಮಿನಿಟಿಸ್ ಅಂದರೆ ಪೋಸ್ಟ್ ಆಫೀಸ್, ಬ್ಯಾಂಕ್, ಬಸ್ ಸ್ಟ್ಯಾಂಡ್, ಪಡಿತರ ಅಂಗಡಿಗಳು, ರೀಕ್ರಿಯೇಷನ್ ಸೆಂಟರ್, ಧಾರ್ಮಿಕ-ಶೈಕ್ಷಣಿಕ ಕೇಂದ್ರಗಳು ಹೀಗೆ ಹಲವಾರು ರೀತಿಯ ಪ್ರದೇಶಗಳಿದ್ದು, ಈ ಕುರಿತು ಕೂಲಂಕುಷವಾಗಿ ಪರಿಶೀಲಿಸಿ ಸ್ಥಳ ಪರಿಶೀಲನೆ ಮಾಡಿ ವರದಿ ಸಲ್ಲಿಸಲು ಅಧಿಕಾರಿಗಳಿಗೆ ತಿಳಿಸಿದರು.
ಮಹಾನಗರ ಪಾಲಿಕೆ ಆಯುಕ್ತರಾದ ಅಶೋಕ ದುಡಗುಂಟಿ ಸೇರಿದಂತೆ ವಿವಿಧ ಇಲಾಖೆ ಅಧಿಕಾರಿಗಳು ಉಪಸ್ಥಿತರಿದ್ದರು.
