ಬೆಳಗಾವಿ: ವಿದ್ಯುತ ಟ್ರಾನ್ಸ್‌ಫಾರ್ಮರನಂತೆ ಗೋಚರಿಸುತ್ತಿದ್ದ ಪೆಟ್ಟಿಗೆಗಳಲ್ಲಿ ಅಕ್ರಮವಾಗಿ ಸಾಗಿಸುತ್ತಿದ್ದ ಗೋವಾ ಮದ್ಯವನ್ನು ಅಬಕಾರಿ ಅಧಿಕಾರಿಗಳು ವಶಪಡಿಸಿಕೊಂಡಿದ್ದಾರೆ. ಕಂಟೇನರ್‌ನಲ್ಲಿ ಅಕ್ರಮವಾಗಿ ಮದ್ಯ ಸಾಗಣೆ ಮಾಡಲಾಗುತ್ತಿದೆ ಎಂಬ ಖಚಿತ ಮಾಹಿತಿ ಮೇರೆಗೆ ಅಬಕಾರಿ ಎಸ್ಪಿ ವಿಜಯಕುಮಾರ ಹಿರೇಮಠ ಅವರ ನೇತೃತ್ವದ ಅಧಿಕಾರಿಗಳ ತಂಡ ಈ ಕಾರ್ಯಾಚರಣೆ ನಡೆಸುವಲ್ಲಿ ಯಶಸ್ವಿಯಾಗಿದೆ
20 ಲಕ್ಷ ಬೆಲೆಬಾಳುವ ವಾಹನಗಳು ಹಾಗೂ 10 ಲಕ್ಷ ಮೌಲ್ಯದ ಅಕ್ರಮ ಮದ್ಯ ಸೇರಿ ಒಟ್ಟು 30 ಲಕ್ಷ ಮೌಲ್ಯದ ವಸ್ತುಗಳನ್ನು ವಶಕ್ಕೆ ಪಡೆಯಲಾಗಿದೆ. ಎರಡು ಕಂಟೇನರ್‌ಗಳಲ್ಲಿ ವಿದ್ಯುತ ಟ್ರಾನ್ಸ್‌ಫಾರ್ಮ‌್ರಗಳನ್ನು ಸಾಗಿಸಲಾಗುತ್ತಿದೆ ಎಂಬ ರೀತಿಯಲ್ಲಿ ಬಾಕ್ಸ್‌ಗಳನ್ನು ವಾಹನದಲ್ಲಿ ಜೋಡಿಸಲಾಗಿತ್ತು. ವಾಹನ ಬೆಳಗಾವಿ ತಾಲ್ಲೂಕಿನ ಹಿರೇಬಾಗೇವಾಡಿ ಬಳಿ ಬಂದಾಗ ಅಬಕಾರಿ ಅಧಿಕಾರಿಗಳು ತಪಾಸಣೆಗೆ ಇಳಿದರು. ಆಗ ಗೋವಾದಿಂದ ತೆಲಂಗಾಣಕ್ಕೆ ಸಾಗಿಸುತ್ತಿದ್ದ ಅಪಾರ ಪಮಾಣದ ಮದ ಪತ್ತೆಯಾಯಿತು ಎಂದು ಅಬಕಾರಿ ಇಲಾಖೆಯ ಹೆಚ್ಚುವರಿ ಆಯುಕ್ತ ವೈ.ಮಂಜುನಾಥ ತಿಳಿಸಿದರು.
ಕೆಲವೇ ದಿನಗಳ ಹಿಂದೆ ಫೆವುಡ್ ಜೋಡಿಸಿ, ಅದರಡಿಯಲ್ಲಿ ಮದ್ಯದ ಬಾಟಲಿಗಳನ್ನು ಇಟ್ಟು ಸಾಗಿಸುತ್ತಿದ್ದಲಾರಿಯನ್ನೂ ಅಬಕಾರಿ ಸಿಬ್ಬಂದಿ ವಶಕ್ಕೆ ಪಡೆದಿದ್ದರು. ಸಿನಿಮೀಯ ರೀತಿಯಲ್ಲಿ
ವಶಕ್ಕೆ ಪಡೆದಿದ್ದರು. ಸಿನಿಮೀಯ ರೀತಿಯಲ್ಲಿ ಯಾರಿಗೂ ಅನುಮಾನ ಕೂಡ ಬಾರದಂತೆ ಸಿದ್ಧತೆ ಮಾಡಿಕೊಂಡು ಮದ್ಯ ಸಾಗಣೆ ಮಾಡಲಾಗುತ್ತಿತ್ತು. ಈಗ ಆರೋಪಿಗಳು ಮತ್ತೊಂದು ಮಾರ್ಗ ಅನುಸರಿಸಿ, ನಮ್ಮ ಕಣ್ಣು ತಪ್ಪಿಸಲು ಯತ್ನಿಸಿದ್ದಾರೆ. ಆದರೆ, ಚಾಣಾಕ್ಷ ನಡೆಯಿಂದ ಈ ಕಾರ್ಯಾಚರಣೆ ಯಶಸ್ವಿಯಾಗಿದೆ ಎಂದು ಅವರು ಹೇಳಿದರು.
ಎರಡೂ ವಾಹನಗಳಲ್ಲಿ ಲಕ್ಷಾಂತರ ರೂಪಾಯಿ ಮೌಲ್ಯದ ವಿವಿಧ ಬ್ರಾಂಡ್‌ಗಳ ಮದ್ಯದ ಬಾಟಲಿಗಳಿದ್ದು, ವಶಕ್ಕೆ ಪಡೆಯಲಾಗಿದೆ. ಚಾಲಕ ಮಹಾರಾಷ್ಟ್ರದ ಶ್ರೀರಾಮ್ ಎಂಬಾತನನ್ನು ಬಂಧಿಸಲಾಗಿದೆ. ವಾಹನದಲ್ಲಿ ಮದ್ಯ ಸಾಗಣೆ ಮಾಡುತ್ತಿರುವ ವಿಷಯ ಚಾಲಕನಿಗೂ ತಿಳಿದಿರಲಿಲ್ಲ ಎಂದೂ ಅವರು ಮಾಹಿತಿ ನೀಡಿದರು.
‘ಮದ್ಯ ಮಾರಾಟ ಮಾಡಿದ ಮಾಲೀಕರನ್ನು ಹುಡುಕಿ ವಿಚಾರಣೆ ಮಾಡಲಾಗಿದೆ. ಆದರೆ, ಮದ್ಯ ಮಾರುವುದು ಮಾತ್ರ ನಮ್ಮ ಕೆಲಸ. ಖರೀದಿದಾರರು ಹೇಗೆ ಸಾಗಿಸುತ್ತಾರೆ, ಎಲ್ಲಿಗೆ ಸಾಗಿಸುತ್ತಾರೆ ಎಂಬುದು ನಮಗೆ ತಿಳಿದಿಲ್ಲ’ ಎಂಬ ಉತ್ತರ ನೀಡಿದ್ದಾರೆ’ ಎಂದೂ ಅವರು ವಿವರಿಸಿದರು.
ಅಬಕಾರಿ ಜಂಟಿ ಆಯುಕ್ತ ಫಿರೋಜ್ ಖಾನ್ ಕಿಲ್ಲೇದಾರ, ಉಪ ಆಯುಕ್ತ ವನಜಾಕ್ಷಿ ಅವರ ಮಾರ್ಗದರ್ಶನದಲ್ಲಿ ಉಪ ಅಧೀಕ್ಷಕ ರವಿ ಮುರುಗೋಡ, ಇನ್‌ಸ್ಪೆಕ್ಟರ್‌ಗಳಾದ ರವೀಂದ್ರ ಹೊಸಳ್ಳಿ ಹಾಗೂ ಮಲ್ಲೇಶ್ ಉಪ್ಪಾ, ಸಿಬ್ಬಂದಿ ತಂಡ ಈ ಕಾರ್ಯಾಚರಣೆ ನಡೆಸಿದೆ.
ಮದ್ಯವಿದ್ದ ವಾಹನ ಸಿಕ್ಕಿಬಿದ್ದಾಗ ದಂಧೆಕೋರರು ಜಿಪಿಎಸ್ ಲಾಕ್ ಬಳಸಿ ವಾಹನದ ಎಂಜಿನ್ ಬಂದ್‌ ಮಾಡುತ್ತಾರೆ. ಇದರಿಂದ ತಾಂತ್ರಿಕ ಸಿಬ್ಬಂದಿ ಕರೆಯಿಸಿ ಈ ಲಾಕರ್ ತೆಗೆಯಬೇಕಾಗುತ್ತದೆ. ಈಗಲೂ ಕೂಡ ಇದೇ ರೀತಿ ಆಗಿದೆ. ಈ ರೀತಿಯ ಅಪರಾಧ ನಿಯಂತ್ರಣಕ್ಕಾಗಿ ಸಿಬ್ಬಂದಿಗಳಿಗೆ ತರಬೇತಿ ನೀಡಲಾಗುತ್ತಿದೆ ಎಂದು ಅಧಿಕಾರಿಗಳು ಮಾಹಿತಿ ನೀಡಿದರು.
