ಬೆಳಗಾವಿ: ಅಮೇರಿಕಾದ ಅಧ್ಯಕ್ಷೀಯ ಚುನಾವಣೆಯಲ್ಲಿ ಬೆಳಗಾವಿ ಜಿಲ್ಲೆ ಸದ್ದು ಮಾಡಿದ್ದು, ಬೆಳಗಾವಿಯ ಶ್ರೀನಿವಾಸ ಠಾಣೇದಾರ ಎಂಬುವರು ಎರಡನೇ ಬಾರಿಗೆ ಅಮೆರಿಕ ಸಂಸತ್‌ಗೆ ಆಯ್ಕೆಯಾಗುವ ಮೂಲಕ ರಾಜ್ಯದ ಹೆಸರನ್ನು ಪಸರಿಸಿದ್ದಾರೆ.
ಅಮೆರಿಕದ ಸಂಸತ್‌ ಪ್ರತಿನಿಧಿಗಳ ಚುನಾವಣೆಯಲ್ಲಿ ಮಿಚಿಗನ್‌ ರಾಜ್ಯದಿಂದ ಸ್ಪ ರ್ಧಿಸಿದ್ದ ಶ್ರೀನಿವಾಸ ಅವರು ಸಾಹಿತಿ, ವಿಜ್ಞಾನಿ ಹಾಗೂ ಅಮೆರಿಕದ ಉದ್ಯಮಿಯಾಗಿ ಹೆಸರು ಗಳಿಸಿದ್ದಾರೆ.
1955ರ ಫೆ.22ರಂದು ಚಿಕ್ಕೋಡಿಯಲ್ಲಿ ಜನಿಸಿದ
ಶ್ರೀನಿವಾಸ್‌ ಠಾಣೇದಾರ ಅವರ ತಂದೆ ಆರ್ಥಿಕವಾಗಿ ಸಬಲರಾಗಿರಲಿಲ್ಲ. ಅವರ ತಂದೆ ಬೆಳಗಾವಿ ನ್ಯಾಯಾಲಯದಲ್ಲಿ ಕಾರ್ಯನಿರ್ವಹಿಸುತ್ತಿದ್ದರು. ಹೀಗಾಗಿ ಚಿಕ್ಕೋಡಿ ಬಿಟ್ಟು
ಬೆಳಗಾವಿಯ ಶಹಾಪುರದ ಮೀರಾಪುರ ಗಲ್ಲಿಯಲ್ಲಿ ವಾಸವಿದ್ದರು. ಪ್ರಾಥಮಿಕ ಹಾಗೂ ಪ್ರೌಢಶಿಕ್ಷಣವನ್ನು ಬೆಳಗಾವಿಯ ಚಿಂತಾಮಣರಾವ್‌ ಸರ್ಕಾರಿ ಪದವಿ ಪೂರ್ವ ವಿದ್ಯಾಲಯದಲ್ಲಿ ಪೂರ್ಣಗೊಳಿಸಿದ ಶ್ರೀನಿವಾಸ ಅವರು ಕರ್ನಾಟಕ ವಿಶ್ವವಿದ್ಯಾಲದಿಂದ ಬಿಎಸ್ಸಿ ಪದವಿ,
1977ರಲ್ಲಿ ಬಾಂಬೆ ವಿಶ್ವವಿದ್ಯಾಲಯದಿಂದ ರಸಾಯನ ವಿಜ್ಞಾನದಲ್ಲಿ ಸ್ನಾತಕೋತ್ತರ ಪದವಿ ಪಡೆದು, 1979ರಲ್ಲಿ ಅಮೆರಿಕಕ್ಕೆ ತೆರಳಿದ್ದರು. 1982ರಲ್ಲಿ ಪಾಲಿಮರ್‌ ಕೆಮಿಸ್ಟ್ರಿ ವಿಷಯದಲ್ಲಿ ಪಿಎಚ್‌ಡಿ ಪದವಿ ಗಳಿಸಿದ ನಂತರ 1982ರಿಂದ 1984ರವೆಗೆ ಮಿಚಿಗನ್‌ ವಿಶ್ವವಿದ್ಯಾಲಯದಲ್ಲಿ ಕಾರ್ಯ ನಿರ್ವಹಿಸಿದ್ದರು. 1984ರಿಂದ 1990ರವರೆಗೆ ಪಾಲಿಮರ್‌ ಸಿಂಥೆಸಿಸ್‌ ಕೆಮಿಸ್ಟ್‌ ಹಾಗೂ ಪ್ರಾಜೆಕ್ಟ್ ಲೀಡರ್‌ ಆಗಿ ಪೆಟ್ರೊಲೈಟ್‌ ಕಾರ್ಪೊರೇಷನ್‌ನಲ್ಲಿ ಕಾರ್ಯನಿರ್ವಹಿಸಿದ ನಂತರ ತಮ್ಮದೇ ಸ್ವಂತ ಉದ್ಯಮ ಆರಂಭಿಸಿದ್ದರು.
ಶ್ರೀನಿವಾಸ ಅವರ ಸಾಧನೆಗೆ ಚಿಂತಾಮಣರಾವ್‌ ಶಾಲೆಯ ಶಿಕ್ಷಕರು ಹಾಗೂ ವಿದ್ಯಾರ್ಥಿಗಳಿಗೆ ಹೆಮ್ಮೆ ಇದೆ. ಬಹಳ ವರ್ಷಗಳ ಹಿಂದೆ ಬೆಳಗಾವಿಗೆ ಬಂದಾಗ ಒಮ್ಮೆ ಶಾಲೆಗೆ ಅವರು ಭೇಟಿ ನೀಡಿದ್ದರು ಎಂದು ಸ್ಮರಿಸಿಕೊಳ್ಳುತ್ತಾರೆ. ಶ್ರೀನಿವಾಸ ಆಡಿ ಬೆಳೆದ ಬೆಳಗಾವಿ ಮನೆ ಈಗ ಇಲ್ಲ. ಈ ಮನೆಯ ಜಾಗದಲ್ಲಿ ದೊಡ್ಡ ಮನೆಗಳಾಗಿವೆ. ಆದರೆ ಶ್ರೀನಿವಾಸ ಅವರ ಅಂದಿನ ದಿನಗಳು ಹಾಗೂ ಅವರ ಜೊತೆ ಆಟ ಆಡಿದ ಗೆಳೆಯರಿಗೆ ಈಗಲೂ ಹಿಂದಿನ ದಿನಗಳ ಸುಮಧುರ ಕ್ಷಣಗಳ ನೆನಪು ಇದೆ. ಈಗ ನೆನಪುಗಳ ಜೊತೆಗೆ ಶ್ರೀನಿವಾಸ ಅವರ ಸಾಧನೆ ಹೆಮ್ಮೆ ಬರುವಂತೆ ಮಾಡಿದೆ.
ಎರಡನೇ ಬಾರಿಗೆ ಅಮೇರಿಕಾ ಸಂಸತ ಪ್ರವೇಶಿಸಿದ ಬೆಳಗಾವಿಯ ಠಾಣೆದಾರ
